我的母乳訪問@2014

原文刋登於畫公仔的草的fb專頁內

https://www.facebook.com/photo.php?fbid=477884485673376&set=a.158788774249617.31341.140312532763908&type=1&theater

我自己好鍾意大家庭, 一直都好想生好多個小朋友, 但係經濟上真係唔係咁ok, 所以兩個就收手, 如果我有錢, 會至少一打, 儲齊十二生肖, 可以自己教 (不過唔會做家務), 好似Discover播的The Duggars Family咁. 有次係母乳group見到一個令我好羨慕的HK媽媽, 佢有6個小朋友, 所以我問左佢可唔可以同佢做個訪問, 自己做個record, 間中幻想自己生左半打都好. 廢話少講, 碌落去睇下個訪問:

草: hi, mandy, 我係一個母乳group得知你有6個小朋友, 好犀利呀, 可唔可以講下佢地分別幾多歲?

M: 大女15 二女13 三女11 四女7 五子3 六女歲半

草: 你全職湊嗎? 係唔係好辛苦, 定係好enjoy? 

M: 係呀, 現全職湊, 辛苦, 但都enjoy.

草:可唔可以分享一下你一日大約係點過的?

M: 大幾個返學返全日架，黃昏前主要照顧仔仔（返上午）和 細女。上午 係做家務和陪細女玩, 之後接仔放學。

下午 食飯後，陪仔做功課。陪他們玩一陣，之後他們午睡。我就可以休息一會。有時煲老火湯的話，就會這時煲定。之後接四女放學。其他女兒會自行放學回家。返來做功課不用我理(除左不明白地方問我或家姐外)。之後準備晚餐。晚飯後由他們輪洗碗不用我理。洗澡也只需和最細兩個沖。其他有自理能力。六公主也十七個月。所以她三餐固體跟我們吃。奶都係二或三次。無飲夜奶。可能她見哥哥姊姊們如何做，模仿力強。生活習慣也規律。除了有時爭東西時勞駕我擺平外。基本上他們算乖巧。

草:點解會生6個? 係鍾意小朋友定大家庭?

M: 鍾意小朋友和認為 有 兄弟姊妹關照的家庭較為溫馨

草:好多人覺得仔女多, 資源會分薄, 你會唔會有呢個諗法? 養難唔難?

M: 貴有貴養, 平有平養。不必要的花費盡量避免(我指係父母的個人享受,娛樂)。

沒錯。當子女多時候好多時在物資都會被分薄的。正面些來看, 會教曉他們共享資源。

有時會爭玩具或有不禮讓的情況,但這時就是教他們等待與共享的時機.

教養子女方法很多, 我也是從網上文章和參加講座學回來的, 當然對六個個體, 有時不能用同一個方法去幫助他們成長

草:可唔可以講下你湊仔生活之中, 最開心同最唔開心o既事?

M: 最開心就是見証他們能健康成長和他們積極去玩和學習, 和樂意與父母分享他們的感受. 

最唔開心婚後初初十年,與丈夫相處有很多磨擦, 教導子女有分歧之時爭執勁多><

草:仲有冇計劃再生呀?

M:冇

草:你6個小朋友都有食過母乳? 可唔可以大約講下你餵左幾多時間?

M: 十五年前開始我的餵哺母乳生涯, 

大公主出世,我當時信心不足,以致復工後(兩個半月)沒再餵母乳,

但已為女兒身體建立了抗體,就算病也復原得快.

相比起其他人,她一年可能少至一至兩次生病.萬幸了.

二女餵左半年...

就係當時信心不足誤信了人講半歲後沒營養價值,於是放棄了...

三女餵左一年...

她有咬我，但我兇佢兼要佢放口後,知道唔咬得後沒事.直至一歲後她開始唔多肯吃奶...

至於四女，是最長時間，經驗累積下，餵到28個月後自然離乳!廿八個月開始,她沒再問我要奶奶,兩星期後,斷定她不再要母乳...

五公子吃母乳至十九個月。 由於當時懷孕而他或者感受到細b需要而自動離乳。

其實試過俾妹妹d奶佢飲架，但飲左幾次就唔要，話留俾妹妹飲。哈哈！至於六公主,

她已18個半月了,仍餵哺中.

草:湊幾個仲餵會唔會覺得難? 好多人話餵人奶好困身.

M:初初幾個月係. 但我是全親餵的, 出街只用哺乳巾就可以周街去, 甚至乎出席活動都係咁帶她出街

草:係咩原因會令你keep住餵人奶, 並且仲有心係group入面鼓勵同分享經驗比其他媽媽呢?

M:因為所有哺乳類動物皆是孩子吃媽媽的母乳, 只有人類才有吃奶粉, 

我覺得餵母乳係最天然, 最低敏, 對母嬰最佳的親子時刻,對母體復原也是最好的,母乳的的營養和抗體是嬰兒最佳的保護,奶粉不能全部取代到的…其次是因為想其他媽媽也能得到此益處,所以咁積極在谷協助解答媽媽疑問.

草:係漫長的母乳生涯, 最唔開心同最難你覺得係咩? 

M:最困難都係做新手媽媽之時,咩都唔識,到生第二個困難也沒咁多,除左開始減餵奶次數而造成塞奶最困擾

草:你覺得係唔係越餵越易?

M:係呀,越餵越順暢,因為掌握到餵的技巧

草:餵第一個同餵第六個時, 你見到整體哺乳風氣有冇唔同? 

M:很大分別…大女那時係很少香港媽媽肯餵母乳的.因為職場不支援,社會上的支持度低

相比生細女時,很多媽媽一開始選餵母乳完全不同, 開始較多商場/場所有餵哺房, 社會上對母乳的認識較十多年前有較多認知, 而且多了網上平台媽媽間有互相鼓勵係大大不同

草:有咩餵奶心得可以同大家SHARE?

M: 生bb之前多找相關資料, 請教一些經驗媽媽們. 另外請家人朋友給予支持母乳媽媽們, 何謂支持, 就是要對餵母乳有足夠知識, 不是旁敲側擊地說一些打擊媽媽的說話.

生產後盡快俾bb吃第一口奶, 密密俾bb吃奶…在院期間有需要時俾醫護照顧bb一會, 自己去休息放鬆… 出院後回家必定要多飲湯水/ 吃夠飯(可以的話餐餐吃飯) / 有足夠休息(最好b瞓你就瞓,唔瞓也要閉目養神或做自己想做的事放鬆心情), 勿做操勞功夫(家務), 尤以要照顧較大的孩子的媽媽, 請家人/朋友在坐月期間多多協助, 間中幫你照顧短時間也好,就算坐月後,每當你情緒不穩時, 也要謹記, bb會感受到你不安, 你需要找方法放鬆自己才能輕鬆餵奶,需要時找同路人去呻都是好方法, 若是餵哺過程有疑問, 可找健康院的母乳姑娘/打電話母協熱線/請教經驗媽媽協助…

xxx記得我生仔仔時, 四女也有家長們協助我帶她返學放學,自己不用頻撲,可全力照顧個細的xxx

顧掂自己身心靈, 之後的餵奶路就會輕鬆好多…

草:可唔可以講D野鼓勵下新手媽媽? 

M: 最重要的是,要對自己的身體和乳房有信心, 餵奶和乳房大小絶無關係, 心中有奶, 自然有奶! 

草:多謝你百忙之中抽空回應我呢個無聊的要求, 祝你D仔女身體健康 一家和和睦睦 ^ ^